ዐቃቤ ህግ ሐሰተኛ ቼኮችን እና የክፍያ ማረጋገጫ ደብዳቤዎችን በመጠቀም ከኢትዮጵያ ንግድ ባንክ የተለያዩ ቅርንጫፎች ከ60 ሚለየን ብር በላይ ሊያወጡ በሞከሩ የባንክ ሰራተኞች እና ግብረአበሮቻቸው ላይ ክስ መሰረተ
በጠቅላይ ዐቃቤሕግ ዘርፍ የሙስና ወንጀል ጉዳዮች ዳይሬክቶሬት ጄነራል ዐቃቤ ሕግ ከፖሊስ ጋር በመሆን ሲያካሂድ የነበረውን ምርመራ በማጠናቀቅ በታላቁ የኢትዮጵያ ህዳሴ ግድብ ግንባታ ፕሮጀክት ላይ ከሚሳተፈው እና በቀድሞ የሳሊኒ ኮንስትራክሽን በአሁኑ ዊቢውልድ ኢትዮጵያ ተብሎ ከሚታወቀው ድርጅት የኢትዮጵያ ንግድ ባንክ ሂሳብ ውስጥ በድርጅቱ ስም ሀሰተኛ ቼኮች እና የክፍያ ማረጋገጫ ደብዳቤዎችን በማዘጋጀት የኢትዮጵያ ንግድ ባንክ ጅግጅጋ ከተማ በሚገኙ የተለያዩ የባንኩ ቅርንጫፎች ይዘው በመቅረብ በድምሩ ብር 62,986,469.50 ወጪ ለማድረግ በሞከሩ የኢትዮጵያ ንግድ ባንክ የጅግጅጋ ዲስትሪክት የዲጅታል ባንኪንግ ስራ አስኪያጅን ጨምሮ በወንጀል ድርጊቱ ተሳትፎ በነበራቸው 6 ተከሳሾች ላይ ከባድ የሙስና ወንጀል ክስ መስርቷል፡፡
ክሱም የካቲት 25 ቀን 2014 ዓ.ም ለፌደራል ከፍተኛ ፍርድ ቤት ልደታ ምድብ 1ኛ የሙስና ወንጀል ችሎት ቀርቦ 4 ተከሳሾች ያቀረቡት የክስ መቃወሚያ ላይ የዐቃቤ ህግን ምላሽ ለመጠባበቅ እና ሌሎች ቀሪ 2 ተከሳሾች ደግሞ መቃወሚያቸውን ይዘው እንዲቀርቡ በሚል ችሎቱ ለመጋቢት 05 ቀን 2014 ዓ.ም ተለዋጭ ቀጠሮ ሰጥቷል፡
ምንጭ የፍትህ ሚኒስቴር
