ከኢትዮጵያ አየር መንገድ ጋር ተያይዞ በወንጀል የተከሰሱት እነ ዮሃንስ ዳንኤል (ጆን ዳንኤል) “የወንጀል ድርጊቱን አልፈጸምንም ” የእምነት ክህደት ቃላቸውን ሰጡ። በወቅቱ በማህበራዊ ገጾች በተነቀሳቃሽ ምስል በተደገፈ አውሮፕላኑ ውስጥ ሆነው ተቃውሞ ሲያሰሙ መታየታቸው ይታወሳል።
በአየር ንብረት ችግር ወደ መቀለ በረራ እንደማይደረግ በአየር መንገዱ ባለሙያዎች ሲነገራቸው “እንከስከስ አንወርድም” በሚል ጥይቄውን እንደማይቀበሉ ራሳቸው ባሰራጩት ፊልም መታየቱና እንዲህ ያለው ተግባር በዓለም ዓቀፍ የአቪዬሽን ህግ ሳይቀር ክልክል መሆኑን በመጥቀስ በተመሳሳይ ሰዓት የህግ ባለሙያዎች በቪዲዮ ትምህርትና ተግሳጽ ሲሰጡም ነበር። አየር መንገዱም በረራ የተሰረዘበትን ምክንያት፣ በወቅቱ ምን ያህል ዓለም ዓቀፍና የአገር ውስጥ በረራዎች እንደተስተጓጎሉ ዝርዝር መረጃ መስጠቱ አይዘነጋም። ይህን ተከትሎ ነው ክሱም የተጀመረው። ፋና የዛሬውን ችሎት አስመልክቶ ከዚህ የሚወጥለውን ዘግብቧል።
ዮሃንስ ዳንኤል (ጆን ዳንኤል)፣ አማኑኤል መውጫ፣ ናትናኤል ወንድወሰን፣ ኤልያስ ድሪባ፣ ይዲድያ ነጻነት እና እሌኒ ክንፈ የተባሉ ስድስት ተከሳሾች የኢትዮጵያ አየር መንገድ ደህንነትን አደጋ ላይ ለመጣል ተንቀሳቅሰዋል በሚል የቀረበባቸው ክስ ላይ የወንጀል ድርጊት እንዳልፈጸሙ ጠቅሰው በፌደራል ከፍተኛ ፍርድ ቤት 1ኛ ልዩ ልዩ ከባድ ወንጀል ችሎት ዛሬ ቀርበው የእምነት ክህደት ቃላቸውን ሰጥተዋል።
የፍትህ ሚኒስቴር የተደራጁና ድንበር ተሻጋሪ ጉዳዮች ዐቃቤ ሕግ በተከሳሾቹ ላይ ከአንድ ወር በፊት አውሮፕላንን ያለአግባብ መያዝ ወንጀል፣ የመንግስት ሰራተኛ የስራ ግዴታውን እንዳይፈጽም መቃወምና አለመታዘዝ ወንጀል ክስ እንዲሁም በ1ኛ ተከሳሽ ብቻ ደግሞ የአየር መንገዱን መልካም ስም ለሚያጎድፍ በተንቀሳቃሽ ምስል በኮምፒውተር ስርዓት አማካኝነት ማሰራጨት ወንጀል የሚል ክስ ማቅረቡ ይታወሳል።
ተከሳሾቹ የክስ ዝርዝር ከደረሳቸው በኋላ ያቀረቡት የዋስትና ጥያቄያቸው ውድቅ ተደርጎ በማረሚያ ቤት ሆነው ጉዳያቸውን እንዲከታተሉ በተሰጠ ትዕዛዝ መሰረት ከማረሚያ ቤት ቀርበው ጉዳያቸውን ተከታትለዋል።
የተከሳሾች ጠበቆች የክስ ዝርዝሩ እንዲሻሻል የመጀመሪያ ደረጃ የክስ መቃወሚያ ሲያቀርቡ፤ ከሳሽ ዐቃቤ ሕግ ደግሞ የክስ ዝርዝሩ ሊሻሻል አይገባም የሚል መልስ በጽሁፍ ሰጥቷል፡፡
ፍርድ ቤቱ የቀረበውን የክስ መቃወሚያ እና የዐቃቤ ሕግ መልስን መርምሮ በዛሬ ቀጠሮ ተከሳሾቹ ያቀረቡት የክስ መቃወሚያ ፍሬ ነገር ወደ ፊት በማስረጃ የሚጣራ መሆኑን ጠቅሶ ውድቅ አድርጎታል።
ከዚህም በኋላ ተከሳሾቹ በክሱ ዝርዝር የተገለጸውን የወንጀል ድርጊት ሰለመፈጸም አለመፈጸማቸው በፍርድ ቤቱ በቀረበላቸው ጥያቄ መሰረት “የወንጀል ድርጊቱን አልፈጸምንም ” በማለት የእምነት ክህደት ቃላቸውን ሰጥተዋል።
ከሳሽ ዐቃቤ ሕግ ለወንጀሉ መፈጸም ያስረዱልኛል ያላቸው ምስክሮች ቃል እንዲሰማለት በጠየቀው ተለዋጭ ቀጠሮ መሰረት የምስክር ቃል ለመስማት ለሁለት ቀን ማለትም ለሕዳር 18 እና ለሕዳር 19 ቀን 2017 ዓ.ም ተለዋጭ ቀጠሮ ሰጥቷል።
