በትግራይ ታጣቂዎችና የታጣቂዎች ከፍተኛ አመራሮች የሚሳተፉበት የተደራጀ ህገወጥ የወርቅ ንግድ እንደሚካሄድ በተለያዩ መገናኛዎች፣ ማህበራዊ ሚዲያ አውታሮችና የክልሉ ተቃዋሚ ፓርቲዎች በተደጋጋሚ በስፋት ሲያስታውቁ እንደነበር ይታወሳል። በክልሉ ጊዜያዊ መሪ አቶ ጌታቸውና በፌደራል መንግስት ደረጃ የዚህ ህገወጥ ንግድ ጉዳይ አሳሳቢነቱ ሲገለጽ መቆየቱ ይታውሳል። በተለይም ወርቅን ጨምሮ ማዕድናት በኤርትራ በኩል እንዲጋጋዝ መደረጉ ከአገር ኢኮኖሚና ጸጥታ ጋር እንደሚገናኝም ተመልክቶ ገድብ እንዲበጅለት ጥያቄ ሲቀርብ ነበር።በዚሁ ተደጋጋሚ ሮሮና ጥቆማ ይሁን በሌላ በግልጽ ባይገለጽም በወርቅ ማዕድን ቁፋሮ እና ዝውውር ዙሪያ መረጃዎች እንዲያሰባስቡና ሪፖርት እንዲያቀርቡ የተላኩ የትግራይ ቴሌቪዥን ጋዜጠኞች ስፍራው ላይ ደርሰው መረጃ እያሰባሰቡ ባለበት ወቅት በታጣቂዎች መታገታቸውን ይፋ ሆኗል።
በስራ እያሉ የታገቱት የታገቱት ጋዜጠኞች ብዛት ሶስት መሆኑንን ገልጾ ያስታወቀው የትግራይ ቴሌቭዥን ነው። ጣቢያው ዜናውን ይፋ ሲያደርግ የታገቱት ሰራተኞች ሞባይላቸው ከአገልግሎት ውጪ እንዲሆን መደረጉንም አስታውቋል።
ትግራይ ቴሌቪዥን በትግራይ ሰሜናዊ ምዕራብ ዞን ከህገ ወጥ የወርቅ ማዕድን ፍለጋ እና ዝውውር ጋር ተያይዞ የሚነሳው ጉዳይ ለማጥራት የተሰማሩ ጋዜጠኞች መታገታቸውን ይፋ ሲያደርግ እንዳለው እገታው የተፈጸመው ከረፋዱ ሶስት ሰዓት አካባቢ ነው።
ታህሳስ 20/ 2017 ዓ.ም በአስገዳ ወረዳ ‘ ሜይሊ ‘ ተብሎ ከሚጠራ ልዩ ቦታ በምትገኘው መንደር ውስጥ መታገታቸውን አመልክቷል።
ጋዜጠኞቹ በአከባቢው ስላለው ህገ-ወጥ የወርቅ ማዕድን ቁፋሮና ዝውውር በማስመልከት በአካል ቦታው ድረስ በመሄድ የአከባቢውን ነዋሪዎች ፣ አርሶ አደሮችና ሌሎች የህብረተሰብ ክፍሎች ሲያነጋግሩ እንደሰነበቱ የገለፀው የትግራይ ቴሌቪዥን ” የጋዜጠኞች ቡድኑ በስራ እያለ በታጣቂዎች ሊታገት እና ሊታሰር ችሏል ” ብሏል።
የታገቱት የጋዜጠኞች ቡድን ከረፋዱ 4:00 ጀምሮ ሞባይላቸው ከአገልግሎት ውጪ በመደረጉ ምክንያት ያሉበት ሁኔታ እና ድህንነታቸው ማረጋገጥ እንዳልተቻለ አስታውቋል።
ጋዜጠኞቹን የሚመለከት መረጃ ለመጠይቅ በአከባቢው ለሚገኙ የመንግስት አመራሮች ተደጋጋሚ የስልክ ሙከራ ቢያደርግም እንዳልተሳከለት የትግራይ ቴሌቪዥን ባሰራጨው ዜና ይፋ አድርጓል። በዘገባው እገታውን ስለፈጸሙ ታጣቂዎች ማንነት በዝርዝር የተባለ ነገር የለም።
ማንነታቸው ባልታወቁ ታጣቃዎች የታገቱት ሦስት የትግራይ ቴሌቪዥን ጋዜጠኞች በትግራይ ሰሜናዊ ምዕራብ ዞን አስገደ ወረዳ ሜይሊ ተብሎ በሚጠራ ቦታ በሚገኝ እስር ቤት እንደሚገኙ የትግራይ ቴሌቪዥን ማረጋገጡን አስታውቋል። መታሰራቸውን ቢያረጋግጥም አሁንም ያሰራቸውን ክፍል በስም አልጠራም።
ጋዜጠኞቹ ከህገ-ወጥ የወርቅ ማዕድን ፍለጋ፣ በአካባቢው ህዝብ ላይ ከኬሚካል ጋር በተያያዘ ስለተፈጠረው ስጋት ለማጥራትና መረጃ ከህዝብና ከሚመለከታቸው ወገኖች ለማሰባሰብ በሚል ወደ ስፍራው የተላኩት ሪፖርተሮች፣ ሜይሊ ተብሎ በሚጠራ ቦታ በሚገኝ እስር ቤት እንደሚገኙ የትግራይ ቴሌቪዥን ከደቂቃዎች በፊት ማረጋገጡን ያስታወሰው ቲክቫህ መጨረሻ ላይ “ሰማሁ” ብሎ እንደዘገበው ከእስር ሊለቀቁ ችለዋል።
የጋዜጠኞቹ መፈታት በማስመልከት ለቲክቫህ እንደጻፈው ጋዜጠኞቹ መረጃ በማሰባሰብ ስራ እያሉ የተያዙት በአከባቢው በሚገኙ ፓሊስ እና ሚሊሻዎች ነው። ከወረዳው የፀጥታ እና ሌሎች የሚመለከታቸው አካላት መካከል በተደረሰ መግባባት ከሰዓታት እስር ሊለቀቁ እንደቻለ ተመልክቷል።
ጋዜጠኞቹ በአከባቢው ያለውን ህገ-ወጥ የወርቅ ማዕድን ቁፋሮና ዝውውር የሚመለከት የምርመራ ዘገባ በመስራት ላይ እንደነበሩ ለወረዳው የፀጥታ እና አስተዳደር አካላት የተናገሩ ሲሆን የጋዜጠኞች እስር እና እንግልት በክልሉ ካለው የፓለቲካ ቀውስ ጋር ቀጥተኛ ትስስር እንዳለው ተጠቁሟል።
