“አዲስ አበባን ሙሉ በሙሉ የሚያወድም ጊዜው ያለፈበት የኬሚካል ክምችት አለ” በሚል የተሰራጨው መረጃ የተዛባና የተሳሳተ መሆኑን የብሄራዊ መረጃና ደህንነት አገልግሎት አሳሰበ
አዲስ አበባን ሙሉ በሙሉ የሚያወድም ጊዜው ያለፈበት የኬሚካል ክምችት አለ በሚል በአንዳንድ መገናኛ ብዙሃንና ማህበራዊ የትስስር ገፆች የተሰራጨው መረጃ የተዛባና የተሳሳተ በመሆኑ፤ ህብረተሰቡ የዕለተ ተዕለት እንቅስቃሴውን ያለስጋት እንዲያከናወን የብሄራዊ መረጃና ደህንነት አገልግሎት አሳሰበ።
የብሄራዊ መረጃና ደህንነት አገልግሎት ጉዳዩን አስመልክቶ ለኢትዮጵያ ፕሬስ ድርጅት በላከው መግለጫ እንዳስታወቀው፤ በትናንትነው ዕለት የመንግስት ግዥና ንብረት አስተዳደር ኤጀንሲ የሰጠውን ጋዜጣዊ መግለጫ አንዳንድ መገናኛ ብዙሃንና የማህበራዊ የትስስር ገፆች አዛብተው አዲስ አበባን ሙሉ በሙሉ ማውደም የሚችል ጊዜው ያለፈበት የኬሚካል ክምችት አለ በማለት ሃሰተኛ መረጃ በማሰራጨት በከተማዋ ነዎሪዎች ላይ የደህንነት ስጋት ለመፍጠር ሲሞከር እንደነበር አስታውሷል፡፡
ተከማችቷል የተባለው ኬሚካል የኢትዮጵያ እህል ንግድ ድርጅት ለነቀዝ ማጥፊያ ወደ ሀገር ውስጥ ያስገባው መሆኑን ያስታወሰው መግለጫው፤ በአጠቃቀምና በአያያዝ ጉድለት እንዲሁም በቸልተኝነት ምክንያት በሰው ህይወትና በንብረት ላይ ጉዳት እንዳያደርስ ከሚመለከታቸው ባለድርሻ አካላትና ከዘርፉ ባለሙያዎች ጋር በመሆን ሳይንሳዊ ሂደትን ተከትሎ ለማስወገድ በመንግስት በኩል እየተሰራ መሆኑን አመልክቷል፡፡
ኬሚካሎችም ሆኑ ተቀጣጣይ ክምችቶቹ ለታለመለት አላማ ከመዋላቸው በፊትና በኋላ አስፈላጊው ጥበቃና ቁጥጥር እንደሚደረገ የጠቆመው መግለጫው፤ ከሚመለከታቸው አካላት ጋር በመነጋገርም የሚወገዱበት ስርዓት መኖሩን አስታውቋል፡፡
ይሁንና በኤጀንሲው የተሰጠውን ጋዜጣዊ መግለጫ መነሻ በማድረግና አዛብተው በማቅረብ፤ አንዳንድ መገናኛ ብዙሃንና የማህበራዊ ትስስር ገፆች አዲስ አበባን ሙሉ በሙሉ ማውደም የሚችል ጊዜው ያለፈበት የኬሚካል ክምችት በተለምዶ ላፍቶ በሚባለው አካባቢ አለ የሚል ሃሰተኛ መረጃ በማሰራጨት ህብረተሰቡን የማደናገርና ከዚያም ባለፈ የደህንነት ስጋት ለመፍጠር እየሞከሩ መሆኑን መግለጫው አመልክቷል፡፡
በመሆኑም የብሄራዊ መረጃና ደህንነት አገልግሎት አለ የተባለው የኬሚካል ክምችት ለከተማዋ ነዎሪዎች የደህንነት ስጋት የሚፈጠር አለመሆኑን ከሚመለከታቸው አካላት ያረጋገጠ ሲሆን፤ህብረተሰቡ በተሰራጨው የተሳሳተ መረጃ ሳይወናበድ የዕለተ ተዕለት እንቅስቃሴውን ያለምንም ስጋት እንዲያከናውን አገልግሉት መስሪያ ቤቱ አበክሮ ጥሪ አቅርቧል፡. Via / (ኢ.ፕ.ድ)
