ቀደም ሲል ሜቴክ ይባል የነበረውና በኪሳራ ታሪኩን የዘጋው የአሁኑ የኢትዮ ኢንጂነሪንግ ግሩፕ ዋና ስራ አስፈጻሚ አምባሳደር ሱሌይማን ደደፎ በሀገሪቱ የመጀመሪያው እና ትልቁ ዘመናዊ የብረት ፋብሪካ በ2017 በጀት ዓመት በነቀምቴ ከተማ ግንባታው እንደሚጀመር አስታወቁ።
የመንግስት ሚዲያዎች ዋና ስራ አስፈጻሚውን ጠቅሰው እንዳሉት ኢትዮጵያ ጥቃቅን ብሎን ሳይቀር ከውጭ እያስገባች እንደምትገኝ ጠቅሰው፤ ይህንን በማስቀረት በራስ አቅም ለመሸፈን ታቅዷል።
በምዕራብ ኢትዮጵያ የብረት ማዕድን እንዳለ ይታመናል ያሉት ዋና ሥራ አስፈጻሚው፥ በዚህና በሌሎች ምክንያቶች ፋብሪካው በነቀምቴ ከተማ እንዲገነባ መንግስት ወስኗል ብለዋል፡፡
ሙሉ የፋብሪካው ግብአት ከጣሊያን ተገዝቶ ወደ ሀገር ቤት መግባቱን ጠቅሰው፥ ፋብሪካው በውስጡ የተለያዩ ምርቶችን የሚያመርቱ ሦስት ፋብሪካዎች እንዳሉት ጠቅሰዋል።
ፋብሪካው የሚቀርቡለትን የብረት ማዕድናት ወደተለያዩ ምርቶች ቀይሮ እንደሚያመርትም አብራርተዋል።
ፋብሪካውን ለመገንባትም ከ70 እስከ 80 ሚሊየን ዩሮ እንደሚጠይቅ ያነሱት አምባሳደር ሱሌይማን፥ ግንባታው ከአንድ ዓመት ባልበለጠ ጊዜ ውስጥ ይጠናቀቃል ተብሎ እንደሚጠበቅ ገልጸዋል።
ፋብሪካው በመቶዎች ለሚቆጠሩ ዜጎች የስራ ዕድል እንደሚፈጥርና በዓመት 90 ሚሊየን ዶላር ግምት ያለው ምርት የማምረት አቅም እንዳለው ጠቁመዋል። ይህም ከተለያዩ ሀገራት የሚገባውን የብረት ምርት ለመቀነስ እንደሚያስችል ገልጸዋል።
በሌላ በኩል ቢሾፍቱ ላይ ከ10 ዓመት በላይ ለሚሆን ጊዜ በብልሽት ላይ የሚገኘውን የብረት ፋብሪካ በዚህ ዓመት ወደ ስራ ለማስገባት መታቀዱን ገልጸው፤ ሁለቱ ፋብሪካዎች ወደ ስራ ሲገቡ ከውጭ የሚገቡ የብረት ምርት ከመቀነስ ባለፈ በሂደት ወደውጭ ለመላክ ታቅዷልም ነው ያሉት።
