በሀገር አቀፍ ደረጃ የዓይን መነጽር ጥራትና ደረጃን የሚቆጣጠር አካል አለመኖሩ ተገለጸ። በሀገር አቀፍ ደረጃ የዓይን መነጽር ጥራትና ደረጃን የሚቆጣጠር አካል አለመኖሩን በአዲስ አበባ ዩኒቨርሲቲ ጤና ሳይንስ ኮሌጅ ህክምና ትምህርት ቤት የዓይን ህክምና ትምህርት ክፍል ተባባሪ ፕሮፌሰር ዶክተር ሳዲቅ ታጁ አስታወቁ፡፡
ዜጎች ጥራቱ የተረጋገጠ መነጽር ስለማያገኙ ለከፋ የዓይን ጤና ህመም እየተጋለጡ መሆኑ ተጠቁሟል፡፡
ዶክተር ሳዲቅ በተለይ ለአዲስ ዘመን ጋዜጣ እንደገለጹት፤ መነጽር በዓይን ጤና ሥራ ውስጥ ልክ እንደ መድኃኒት የሚያገለግል የሕክምና ቁስ ነው፡፡
ሆኖም በሀገር አቀፍ ደረጃ እንደ መድኃኒት ሁሉ ጥራቱንና ደረጃውን የሚለይለት አካል የለም፤ ቁጥጥርም አይደረግበትም፡፡
በዚህም ምክንያት ዜጎች ጥራቱ የተረጋገጠ ምርት ስለማያገኙ ለተደጋጋሚ ወጪ እና ለተጨማሪ የዓይን ችግር እየተጋለጡ ይገኛሉ ብለዋል፡፡
የመነጽር ጥራትና ደረጃ ቁጥጥር ባለመኖሩ ሰዎች በትዕዛዝ የተሰጣቸውን መነጽር አውቀው አይገዙም ያሉት ዶክተር ሳዲቅ፤ በዝቅተኛ ዋጋ ያገኙትን እየገዙ ለተጨማሪ የዓይን አደጋ ተጋላጭ እየሆኑ እንደሚገኙ ገልጸዋል፡፡
የመነጽርን ጥራትና ደረጃ የሚቆጣጠር አካል ባለመኖሩ አሁን ላይ በሺዎች የሚቆጠሩ መነጽር ቤቶች እና በየመንገዱ መነጽር የሚያዞሩ ከመበራከታቸው ባሻገር እንዳሻቸው ሠርተውና ቆርጠው እንዲሁም ዋጋ ተምነው ለተጠቃሚው የሚያቀርቡ ሆነዋል፡፡
ይህ ደግሞ በርካቶችን ለከፋ የዓይን ጤና ችግር እያጋለጣቸው እንደሆነ ተናግረዋል፡፡
ከዓይን ጤና ችግር ጋር በተያያዘ ብቻ በሀገር አቀፍ ደረጃ እድሜያቸው እስከ 16 የሚደርሱ ልጆች ከ10ሩ አንዱ መነጽር እንደሚያስፈልገው፤ በከተሞች አካባቢም 20 በመቶ የሚሆኑ ልጆች መነጽር የግድ መጠቀም እንዳለባቸው በጥናት መመላከቱን የጠቆሙት ዶክተር ሳዲቅ፤ ማንኛውም እድሜው ከ35 ዓመት በላይ የሆነ ሰው መነጽር መጠቀም እንዳለበት አስታውሰዋል፡፡
በትዕዛዝና በተፈጥሮ የግድ መነጸር መጠቀም ያለባቸው ዜጎች እንደ ሀገር በርካታ ከመሆናቸው ጋር ተያይዞ የመነጽሮች ጥራትና ደረጃን አለመቆጣጠር የዓይን ጤና ችግርን በከፍተኛ ሁኔታ እንዲጨምር ያደርገዋል፡፡
እንደ ሀገር ይህ ጉዳይ ትኩረት ያለማግኘቱ ብዙዎችን ተጎጂ ያደረጋቸዋልና መንግስት ሊያስብበት እንደሚገባ አመላክተዋል፡፡
አሁን ላይ ተጠያቂነት ያለበት አሰራርን በሕግ ማስቀመጥ ካልተቻለ በትንሹ ከ35 ዓመት በላይ ያሉት የማህበረሰብ ክፍሎች ለከባድ የዓይን ጤና ችግር ተጋላጭ እንደሚሆኑ ጠቅሰውም፤ ከአዋቂዎች ይልቅ መነጽር የሚያስፈልገው ልጆች በመሆናቸቸው እነርሱ ላይ ትኩረት አድርጎ መሥራትም እንደሚገባ ተናግረዋል፡፡
የልጆች ዕይታ ቀድሞ መቀነስ ከአደጉ በኋላ ለመመለስ ያስቸግራል፡፡ በዚህም ልጆች ጥራትና ደህንነታቸው የተጠበቀ መነጽሮችን ተጠቃሚ እንዲሆኑ መንግሥት ልዩ ትኩረት ሰጥቶ ሊሰራ ይገበባል ብለዋል፡፡
እንደ ኢትዮጰያ የዓይን ሐኪሞች ማህበር እና እንደ አዲስ አበባ ዩኒቨርስቲ የዓይን ሕክምና ክፍል ከመንግሥት አካላት ጋር ንግግር እየተደረገ እንደሚገኝ ጠቅሰው፤ ምርቱ ከቀረጥ ነጻ ገብቶ በአነስተኛ ዋጋ የሚቀርብበት እድል እንዲፈጠር እየተሠራ ስለመሆኑም አመላክተዋል፡፡
ለችግሩ ዘላቂ መፍትሔ የሚሆነው መንግሥት በቻለው መጠን በመነጽር ሥራና የጥራት ደረጃ ላይ ልዩ ትኩረት ሰጥቶ ሲሰራ እንደሆነም አስረድተዋል፡፡
እንደዓለማቀፍ ጥናቶች መረጃ እ.አ.አ በ2050 በአነጣጥሮ ማየት ግድፈት ምክንያት ብቻ 50 በመቶ የሚሆነው የዓለማችን ሕዝብ መነጽር ይፈልጋሉ የሚሉት ዶክተር ሳዲቅ፤ ምንም አይነት የዓይን መነጸር የጥራትና የደረጃ ቁጥጥር በማይደረግባት ኢትዮጵያ ደግሞ ይህ ቁጥር የት ላይ ሊደርስ እንደሚችል መገመት አያዳግትም ነው ያሉት፡፡
ጥራትንና ደረጃን ከማስጠበቅ አንጻር ተቆጣጣሪ አካል መመደብ ላይ ትኩረት ማድረግ ከአሁኑ ይበጃል ሲሉም መክረዋል፡፡
ዋጋን ከማረጋጋት አንጻርም መድኃኒትን በሀገር ውስጥ ማምረት እንደተቻለ ሁሉ የዓይን መድኒት የሆነውን መነጽርንም በሀገር ውስጥ በመንግሥት አለያም በግል አጋርነት ማምረት ቢቻል መልካም እንደሆነ ዶክተር ሳዲቅ አስገንዝበዋል፡፡
በጽጌረዳ ጫንያለው ጋዜጣ ፕላስ
