የአጥንት መሳሳት ህመም

ምንም አይነት የህመም ስሜት ሳይኖረው ወይንም ምልክቶችን ሳያሳይ ለከፍተኛ የጤና ችግር ብሎም ለሞት ሊዳርገን የሚችለውን የአጥንት መሳሳት ችግር ምንድን ነው?

ከሰውነት ክፍሎቻችን አጥንት ጠንካራው እና በቀላሉ የማይጎዳ ነው፤ ነገር ግን አጥንት በመሳሳት ምክንያት ጉዳት ሊደርስበት ይችላል። አጥንትን ደካማ እና በቀላሉ ተሰባሪ የሚያደርገው የአጥንት መሳሳት ሕመም ነው።

አጥንት ሁልጊዜ በለውጥ ላይ ነው፣ በቋሚነት ሴሎቹ ይሞታሉ ቀጥሎም ይተካሉ። የአጥንት መሳሳት የሚከሰተው አጥንት የመተካት አቅሙ ሲቀንስ ነው፤ ነገር ግን በብዛት የሚበልጠው መገንባቱ ነው።

የአጥንት መሳሳት ወንድ ሴት ሳይል ሁሉንም የሚያጠቃ ሕመም ቢሆንም ሴቶች ከወንዶች የበለጠ ተጋላጭ ናቸው።

ሕመሙ ነጮች እና የሩቅ ምሥራቅ ሰዎች ላይ ይበረታል፤ በተለይ ደግሞ በዕድሜ የገፉ ሴቶች ላይ ይበረታል። ከአጥንት መሳሳት ጋር የተያያዙ ስብራቶች በአብዛኛው ወገብ፣ መዳፍ ወይም አከርካሪ ላይ ይስተዋላሉ።

የአጥንቱ አሠራር በአንድ በኩል እየተገነባ በአንድ በኩል ሲፈርስ፤ የአጥንታችን ጥንካሬው ጤናማ ይሆናል። የማፍረሱ ሂደት ሲያይል ነው የአጥንት መለስለስ የሚመጣው።

ምልክቶች ምንድን ናቸው

በሽታው ገና ሲጀማምር ብዙ ምልክት አያሳይም፤ ነገር ግን አንዴ አጥንት ከሳሳ ወዲህ የሚከተሉት ምልክቶች ይታያሉ፡-

– የጀርባ ሕመም – ከጊዜ በኋላ ቁመት መቀነስ

– መጉበጥ – በቀላሉ የሚሰበር አጥንት

አጥንት መሳሳት በምን ምክንያት ይመጣል

የአጥንት መሳሳትን ሊያስከትሉ ከሚችሉ ምክንያቶች አንዱ ዕድሜ ነው፤ ነገር ግን አሁን አሁን በወጣቶችም ላይ ይህ ችግር እያጋጠመ ይገኛል።

የቫይታሚን ዲ እና የካልሺየም እጥረት፤ እንዲሁም የእንቅርት በሽታ ለዚህ አይነተኛ መንስኤዎች ሊሆኑ ይችላሉ።

የአጥንት መተካካት ሂደት ከ20 ዓመት በኋላ እየቀነሰ ይመጣል፤ እድሜ በጨመረ ቁጥር የአጥንት ክብደት እጅጉን ይቀንሳል በመሆኑም ተጋላጭነቱም ከፍ ያለ ይሆናል።

ሌላው በዘር፣ በአኗኗር ዘይቤ፣ አልኮል አዘውትሮ መጠጣት እና ሲጋራ ማጨስም መንስኤዎቹ ናቸው።

የጤና ሁኔታ እንደ ካንሰር፣ የኩላሊት ወይም የጉበት በሽታ እና የተለያዩ መድሃኒቶችን መጠቀም እንደመንስዔነት ይጠቀሳሉ።

ውፍረት፣የመገጣጠሚያ ሕመም እና ለስላሳ መጠጦችን ማዘውተርም ሌሎች ምክንያቶች ሆነው ይነሳሉ።

መከላከያ መንገዶች

የአጥንት መሳሳት ችግርን ለመፍታት በካልሺየም የበለጸጉ ምግቦችን መመገብ፣ ጤናማ አመጋገብ እና አካላዊ እንቅስቃሴዎች የአጥንት መሳሳትን ከመከላከሉም በላይ የሳሱ አጥንቶችን ያጠነክራሉ።

ወተት እና አሳ የመሳሰሉ ምግቦችን ማዘውተር እንዲሁም ጨው እና ቡና በልኩ መጠቀም ይመከራሉ፡፡

ክብደት መቀነስ፣ በቂ የጸሀይ ብርሃን ማግኘት እና የለስላሳ መጠጦችን መቀነስም እንደመፍትሄ ተቀምጧል፡፡

ከአልኮልና ከሲጋራ ሱስ ነፃ መሆን እንደሚገባም ባለሙያዎች ይመክራሉ።

ከመከላከያ ፌስ ቡክ የተወሰደ